തൃശ്ശൂര്: കൊവിഡ് -19 ന്റെ പശ്ചാത്തലത്തില് വിദൂര പ്രദേശങ്ങളിലെ ആദിവാസി മേഖലകളില് ഭക്ഷണവും ആരോഗ്യ സേവനങ്ങളും ഉറപ്പാക്കുന്നതിന് നടപടി ഊര്ജിതമാക്കുമെന്ന് മന്ത്രി എകെ ബാലന് അറിയിച്ചു.
മൊബൈല് ഹെല്ത്ത് യൂണിറ്റുകള് ഇവിടങ്ങളില് കൂടുതല് സജീവമാക്കും. സംസ്ഥാനത്ത് ലോക്ക് ഡൗണ് പ്രഖ്യാപിച്ചതിനാല് ജില്ലയിലെ ആദിവാസി മേഖലകളില് ഭക്ഷണം, നിത്യോപയോഗ സാധനങ്ങള് എത്തുന്നതിന് പ്രശ്നം നേരിടുന്നില്ല. ബന്ധപ്പെട്ട വകുപ്പ് അതിനുവേണ്ടി നടപടികള് സ്വീകരിച്ചു വരുന്നുണ്ട്. നിലവിലെ സാഹചര്യം മുന്കൂട്ടികണ്ട് ആദിവാസി മേഖലകളില് ഭക്ഷ്യവസ്തുക്കളുടെ കിറ്റ് വിതരണം നേരത്തെ നടത്തിയിട്ടുണ്ടെന്നും മന്ത്രി പറഞ്ഞു.
ഇതിന് പുറമെ സംസ്ഥാന സര്ക്കാര് പ്രഖ്യാപിച്ച ഭക്ഷ്യകിറ്റുകളും മേഖലകളില് വിതരണം ചെയ്യും. പറമ്പിക്കുളം ഉള്പ്പെടെയുള്ള ട്രൈബല് പ്രദേശങ്ങളില് ചില പ്രശ്നങ്ങള് നേരിടുന്നതായി ശ്രദ്ധയില്പ്പെട്ടിട്ടുണ്ട്. അതിനുവേണ്ട പരിഹാരനടപടികള് സ്വീകരിച്ചു വരികയാണെന്നും മന്ത്രി അറിയിച്ചു.
