കൊടിയത്തൂർ: ഗ്രാമപഞ്ചായത്ത് കൃഷിഭവനുമായി സഹകരിച്ച് സലഫി പ്രൈമറി സ്കൂൾ വ്യത്യസ്ത കൃഷി അനുഭവ പാഠങ്ങൾ ഒരുക്കുകയാണ്. മഴ മറയിലെ കൃഷിയടക്കം ഒരേക്കറോളം സ്ഥലത്ത് വിവിധ തരത്തിലുള്ള കാർഷിക നടീലുകൾ നടത്താനുള്ള ഒരുക്കങ്ങളാണ് ഇപ്പോൾ നടക്കുന്നത്. പദ്ധതിയുടെ ഭാഗമായി മഴ മറയുടെ നിർമാണം പൂർത്തിയായി.
കുട്ടികളെ കൃഷി രീതികളും പച്ചക്കറി നടീലും പരിചയപ്പെടുത്തുന്നതിനായുള്ള പദ്ധതിയിൽ ‘പാഠം – 1’ കൃഷി എന്ന പേരിൽ പ്രത്യേക പ്രോൽസാഹന പരിശീലന ക്ലാസ് നടത്തി. കോഴിക്കോട് കേന്ദ്രമായി പ്രവർത്തിക്കുന്ന ഗ്രീൻ വെജ് പദ്ധതി ട്രെയിനറായ സിദ്ദീഖ് തിരുവണ്ണൂർ പഠന ക്ലാസിന് നേതൃത്വം നൽകി. പോട്ടിംഗ് മിശ്രിത നിർമാണം, ഗ്രോബാഗ് കൃഷി, തൈ പരിചരണം തുടങ്ങിയവയിൽ വിദ്യാർത്ഥികൾക്ക് പ്രായോഗിക പരിശീലനം നൽകി. സ്കൂൾ ഓഡിറ്റോറിയത്തിൽ പി.സി അബ്ദുറഹിമാൻ മാസ്റ്ററുടെ അധ്യക്ഷതയിൽ നടന്ന ചടങ്ങ് ഗ്രാമപഞ്ചായത്ത് മെംബർ ഫാത്തിമ നാസർ ഉദ്ഘാടനം ചെയ്തു.
