കാരശ്ശേരി : മരഞ്ചാട്ടിയിൽ ഏറെക്കാലം പൂട്ടിക്കിടന്ന ഖാദി ഉത്പാദനകേന്ദ്രം കാരശ്ശേരി ഗ്രാമപ്പഞ്ചായത്തിന്റെയും കുന്ദമംഗലം ബ്ലോക്ക് പഞ്ചായത്തിന്റെയും സഹായങ്ങളോടെയാണ് 2018 മുതൽ വീണ്ടും തുറന്നുപ്രവർത്തിക്കുന്നത്.
വളരെ പഴക്കമുള്ള കെട്ടിടത്തിൽ അസൗകര്യങ്ങളുടെ നടുവിലാണ് ഇപ്പോഴും ഖാദി ഗ്രാമവ്യവസായ ബോർഡിന്റെ കീഴിലെ ഈ സംരംഭം പ്രവർത്തിക്കുന്നത്. ഇതുകൂടി പരിഹരിച്ചാലേ ഉത്പാദനക്ഷമതയും തൊഴിൽസാധ്യതയുമടക്കമുള്ള കാര്യങ്ങളിൽ പരമാവധിനേട്ടം കൈവരിക്കാനാവൂ.
നൂലുത്പാദനം നടത്തുന്ന സ്പിന്നിങ് വിഭാഗവും വസ്ത്രനിർമാണം നടക്കുന്ന വീവിങ് വിഭാഗവുമാണ് ഇവിടെയുള്ളത്. കാരശ്ശേരി പഞ്ചായത്ത് മുൻകൈയെടുത്ത് ‘സുസ്ഥിരം കാരശ്ശേരി’ പദ്ധതിയിലുൾപ്പെടുത്തിയാണ് അടഞ്ഞുകിടന്ന സംരംഭം വീണ്ടും തുറന്നത്.
