കൊടിയത്തൂർ: ഞങ്ങളും കൃഷിയിലേക്ക് പദ്ധതിയുടെ ഭാഗമായി ഭക്ഷ്യ സുരക്ഷക്ക് മുൻഗണന നൽകുക എന്ന ലക്ഷ്യത്തോടെ കൊടിയത്തൂർ ഗ്രാമപഞ്ചായത്തിൽ വനിത കർഷകർക്ക് കിഴങ്ങ് വർഗങ്ങൾ അടങ്ങിയ ഇടവിളകിറ്റുകൾ വിതരണമാരംഭിച്ചു. 2022-23 ജനകീയാസൂത്രണ പദ്ധതിയിൽ ഉൾപ്പെടുത്തി 2281 വനിത കർഷകർക്ക് 16,67,411 രൂപ വകയിരുത്തിയാണ് പദ്ധതി നടപ്പാക്കിയത്. ഇഞ്ചി, കാച്ചിൽ, ചേന, മഞ്ഞൾ ഉൾപ്പെടെയുള്ള 731 രൂപയുടെ വിളകളാണ് ഒരു കിറ്റിലുള്ളത്.
കൃഷിഭവൻ പരിസരത്ത് നടന്ന ചടങ്ങിൽ ഗ്രാമപഞ്ചായത്ത് പ്രസിഡന്റ് വി ഷംലൂലത്ത് വിതരണോദ്ഘാടനം നിർവഹിച്ചു. വൈസ് പ്രസിഡന്റ് ഷിഹാബ് മാട്ടുമുറി അധ്യക്ഷത വഹിച്ച ചടങ്ങിൽ സ്റ്റാന്റിംഗ് കമ്മറ്റി ചെയർപേഴ്സൺ ആയിഷ ചേലപ്പുറത്ത്, പഞ്ചായത്തംഗങ്ങളായ ബാബു പൊലുകുന്ന്, രതീഷ് കളക്കുടിക്കുന്ന്, രിഹ്ല അബ്ദുൽ മജീദ്, ടി.കെ അബൂബക്കർ, കോമളം തോണിച്ചാൽ, കൃഷി ഓഫീസർ കെ.ടി ഫെബിദ തുടങ്ങിയവർ പങ്കെടുത്തു.
