കൊച്ചി: കൊച്ചിയില് മൂന്ന് വയസുള്ള കുട്ടിക്ക് കൊവിഡ് 19 സ്ഥിരീകരിച്ചു. ഇറ്റലിയില് നിന്ന് എത്തിയ കുടുംബത്തിലെ കുട്ടിക്കാണ് രോഗം സ്ഥിരീകരിച്ചിരിക്കുന്നത്. കുട്ടിയെ കളമശ്ശേരി മെഡിക്കല് കോളേജ് ആശുപത്രിയില് പ്രവേശിപ്പിച്ചിരിക്കുകയാണ്. കുട്ടിയുടെ മാതാപിതാക്കളും നിരീക്ഷണത്തിലാണ്. എന്നാല് ഇവരുടെ ആരോഗ്യ നില തൃപ്തികരമാണ്.
മാര്ച്ച് ഏഴാം തീയതി രാവിലെ ദുബായില് നിന്നുള്ള ഇകെ-503 വിമാനത്തിലാണ് ഇവര് കൊച്ചിയില് എത്തിയത്. വിമാനത്താവളത്തില് വെച്ച് നടത്തിയ പരിശോധനയില് തന്നെ കുഞ്ഞിന് രോഗലക്ഷണങ്ങള് കണ്ടെത്തിയിരുന്നു. ഇതേ തുടര്ന്ന് കുടുംബത്തെ കളമശ്ശേരി മെഡിക്കല് കോളേജ് ആശുപത്രിയിലേക്ക് മാറ്റിയിരുന്നു.
കുട്ടിയുടെ ശരീര സ്രവങ്ങളുടെ പരിശോധനയിലാണ് ഇപ്പോള് രോഗം സ്ഥിരീകരിച്ചത്. ഇതോടെ കേരളത്തില് വൈറസ് ബാധ സ്ഥിരീകരിച്ചവരുടെ എണ്ണം ആറായി. പത്തനംതിട്ടയില് ഒരു കുടുംബത്തിലെ അഞ്ചുപേര്ക്ക് കഴിഞ്ഞ ദിവസം രോഗം സ്ഥിരീകരിച്ചത്.
