അറബിക്കടലില് ന്യൂനമര്ദ്ദം രൂപപ്പെട്ടു; കേരളത്തില് അടുത്ത അഞ്ച് ദിവസത്തേയ്ക്ക് അതിശക്തമായ മഴ, ശക്തമായ കാറ്റും കടലാക്രമണത്തിനും സാധ്യത
തിരുവനന്തപുരം: അറബിക്കടലില് ന്യൂനമര്ദ്ദം രൂപപ്പെട്ടതായി കേന്ദ്ര കാലാവസ്ഥ വകുപ്പ്. തെക്ക് കിഴക്കന് അറബിക്കടലിലാണ് ന്യൂനമര്ദ്ദം രൂപപ്പെട്ടിരിക്കുന്നത്. അടുത്ത 24 മണിക്കൂറില് കൂടുതല് ശക്തി പ്രാപിച്ചു തീവ്ര ന്യൂനമര്ദവും പിന്നീടുള്ള 24 മണിക്കൂറില് ചുഴലിക്കാറ്റുമാകുമെന്ന് പ്രതീക്ഷിക്കുന്ന സിസ്റ്റം വടക്ക് ദിശയില് മഹാരാഷ്ട്ര-ഗുജറാത്ത് തീരങ്ങളെ ലക്ഷ്യമാക്കി സഞ്ചരിക്കുമെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നല്കുന്നുണ്ട്.
ഇതിനു പുറമെ, ന്യൂനമര്ദം രൂപപ്പെട്ടതിന്റെ അടിസ്ഥാനത്തില് കേരളത്തില് അടുത്ത അഞ്ച് ദിവസത്തേയ്ക്ക് ശക്തമായ മഴ തുടരുമെന്നും കേന്ദ്ര കാലാവസ്ഥ വകുപ്പ് അറിയിക്കുന്നുണ്ട്. മഴയ്ക്കൊപ്പം ശക്തമായ കാറ്റും കടലാക്രമണത്തിനുമുള്ള സാധ്യത മുന്നില് കണ്ടുകൊണ്ടുള്ള മുന്നൊരുക്കങ്ങള് നടത്തേണ്ടതാണെന്നും കാലാവസ്ഥ വകുപ്പ് മുന്നറിയിപ്പ് നല്കുന്നു.
കടല് അതിപ്രക്ഷുബ്ധമാകാന് സാധ്യതയുള്ളതിനാല് ഇനി ഒരു അറിയിപ്പുണ്ടാകുന്നത് വരെ കേരള തീരത്ത് നിന്ന് കടലില് പോകുന്നത് പൂര്ണ്ണമായി നിരോധിച്ചിരിക്കുകയാണ്.
