രാഹുല് ഗാന്ധിയുടെ തെരഞ്ഞെടുപ്പ് ജയം റദ്ദാക്കണം; സുപ്രീംകോടതിയെ സമീപിച്ച് സരിത നായര്, ഹര്ജി ഇന്ന് പരിഗണിക്കും
ന്യൂഡല്ഹി: രാഹുല് ഗാന്ധിയുടെ തെരഞ്ഞെടുപ്പ് ജയം റദ്ദാക്കണമെന്നാവശ്യപ്പെട്ട് സരിത എസ് നായര് സമര്പ്പിച്ച ഹര്ജി ഇന്ന് സുപ്രീംകോടതി പരിഗണിക്കും. ചീഫ് ജസ്റ്റിസ് എസ്എ ബോബ്ഡെയുടെ അധ്യക്ഷതയിലുള്ള മൂന്നംഗ ബെഞ്ച് ആണ് സരിത നായര് സമര്പ്പിച്ച ഹര്ജി പരിഗണിക്കുന്നത്.
വയനാട് ലോക്സഭാ മണ്ഡലത്തില് നിന്നുള്ള രാഹുല് ഗാന്ധിയുടെ തെരഞ്ഞെടുപ്പ് റദ്ദാക്കണമെന്നാണ് സരിത നല്കിയിരിക്കുന്ന ഹര്ജിയുടെ ആവശ്യം. വയനാട്ടില് നിന്ന് ലോക്സഭയിലേക്ക് മത്സരിക്കാന് സരിത നല്കിയ നാമനിര്ദ്ദേശ പത്രിക വരണാധികാരി തള്ളിയിരുന്നു. സോളാര് കേസില് സരിതയെ കോടതി ശിക്ഷിച്ച സാഹചര്യം ചൂണ്ടിക്കാട്ടിയായിരുന്നു പത്രിക തള്ളിയത്. അതേസമയം രാഹുലിനെതിരെ മത്സരിക്കാന് അമേഠി മണ്ഡലത്തില് നല്കിയ പത്രിക വരണാധികാരി സ്വീകരിക്കുകയും ചെയ്തു.
വയനാട്ടിലെ പത്രിക തള്ളിയ നടപടിയില് വരണാധികാരിയുടെ ഭാഗത്ത് പിഴവുണ്ടായെന്നും അതിനാല് തെരഞ്ഞെടുപ്പ് റദ്ദാക്കണമെന്നുമാണ് ഉയര്ത്തിയിരിക്കുന്ന ആവശ്യം. ക്രിമിനല് കേസില് രണ്ട് വര്ഷത്തില് അധികം ശിക്ഷ ലഭിച്ചിട്ടുണ്ട് എങ്കില് ജനപ്രാതിനിധ്യ നിയമത്തിലെ 8 (3) വകുപ്പ് പ്രകാരം നാമനിര്ദേശ പത്രിക തള്ളാം.
