India
2022ഓടെ മുഴുവന് ട്രെയിന് കോച്ചുകളിലും സിസിടിവി; അടിമുടി മാറ്റത്തിനൊരുങ്ങി ഇന്ത്യന് റെയില്വേ
ന്യൂഡല്ഹി: രാജ്യത്തെ മുഴുവന് ട്രെയിന് കോച്ചുകളിലും 2022ഓടു കൂടി സിസിടിവി സ്ഥാപിക്കുമെന്ന് ഇന്ത്യന് റെയില്വേ. കുറ്റവാളികളെ കണ്ടെത്താന് മുഖം തിരിച്ചറിയുന്ന നിര്മിത ബുദ്ധി(ആര്ട്ടിഫിഷ്യല് ഇന്റലിജന്റ്സ്) സംവിധാനം ഉപയോഗിക്കുമെന്നും റെയില്വേ ബോര്ഡ് ചെയര്മാന് വികെ യാദവ് പറഞ്ഞു.
കോറിഡോറിനും വാതിലിന്റെ മുകളിലുമായിട്ടായിരിക്കും ക്യാമറകള് സ്ഥാപിക്കുക. എന്നാല്, സ്വകാര്യത ലംഘിക്കുന്ന തരത്തിലായിരിക്കില്ല ക്യാമറകള് സ്ഥാപിക്കുകയെന്നും അദ്ദേഹം വ്യക്തമാക്കി.
58,600 കോച്ചുകളിലും 6100 റെയില്വേ സ്റ്റേഷനുകളിലും 2022 മാര്ച്ചോടുകൂടി സിസിടിവി ക്യാമറകള് സ്ഥാപിക്കുമെന്നും അദ്ദേഹം കൂട്ടിച്ചേര്ത്തു. ട്രെയിനുകളിലും റെയില്വേ സ്റ്റേഷനുകളിലും കുറ്റവാളികള് കയറാതിരിക്കാന് വേണ്ടിയാണ് മുഖം തിരിച്ചറിയുന്ന സാങ്കേതിക വിദ്യ ഉപയോഗിക്കുക.
