കോഴിക്കോട്: തിരുവമ്പാടി സീറ്റില്‍ താമരശ്ശേരി രൂപതയുടെ പിന്തുണ ആവശ്യപ്പെട്ട് ലീഗ് നേതാക്കള്‍ രൂപതാധ്യക്ഷൻ മാർ റമീജിയോസ് ഇഞ്ചനാനിയിലുമായി കൂടിക്കാഴ്ച നടത്തി. ലീഗ് നേതാക്കളായ പി കെ കുഞ്ഞാലിക്കുട്ടി, എം കെ മുനീർ, ഇ ടി മുഹമ്മദ് ബഷീർ എന്നിവരാണ് ബിഷപ് മാർ റെമിജിയോസ് ഇഞ്ചനാനിയിലുമായി കൂടിക്കാഴ്ച നടത്തിയത്. ലീഗിന്റെ സീറ്റായ തിരുവമ്പാടിയിൽ തങ്ങളുടെ സ്ഥാനാർത്ഥിക്ക് പിന്തുണ ആവശ്യപ്പെട്ടാണ് കൂടിക്കാഴ്ച നടത്തിയത്, എന്നാൽ ഇവിടെ ക്രിസ്ത്യൻ സ്ഥാനാർത്ഥി വേണമെന്നതാണ് സഭ ഉന്നയിക്കുന്ന ആവശ്യം.
മുസ്ലീം ലീഗിന്റെ സീറ്റായ തിരുവമ്പാടിയിൽ കഴിഞ്ഞ തിരഞ്ഞെടുപ്പിൽ ലീഗ് സ്ഥാനാർത്ഥി പരാജയപ്പെട്ടത് സഭയുടെ അതൃപ്തി മൂലമാണെന്ന് നേരത്തെ വ്യക്തമായിരുന്നു. വരുന്ന തിരഞ്ഞെടുപ്പിലും തിരുവമ്പാടിയിൽ ലീഗ് സ്ഥാനാർത്ഥിയെ നിർത്തുന്ന സാഹചര്യത്തിൽ സഭയുടെ അതൃപ്തി നീക്കാനാകുമോ എന്ന് പരിശോധിക്കാൻ കൂടിയാണ് നേതാക്കൾ നേരിട്ടെത്തി കൂടിക്കാഴ്ച നടത്തിയത്.
വിഷയത്തിൽ സഭയുടെ നിലപാടുകൾ കോൺഗ്രസിനെയും അറിയിച്ചിരുന്നു. താമരശ്ശേരി സഭാ വിശ്വാസികൾ ഏറെയുള്ള സ്ഥലമാണെന്നും അതിലാൽതന്നെ സഭയിൽ നിന്നൊരാൾ മത്സരിക്കണമെന്നുമുള്ള ഉറച്ച നിലപാടിലാണ് സഭ. സഭയുടെ ഈ നിലപാട് വരുന്ന തിരഞ്ഞെടുപ്പിൽ വിവിധ രാഷ്ട്രീയ പാർട്ടികളുടെ സ്ഥാനാർഥി നിർണ്ണായത്തിൽ ഏറെ സ്വാധീനം ചെലുത്തുമെന്നാണ് നിരീക്ഷിക്കപെടുന്നത്.
