കൈതപ്പൊയിൽ-അഗസ്ത്യമുഴി റോഡ് നിർമ്മാണത്തിന്റെ ശോചനീയാവസ്ഥ പരിഹരിക്കണം; പ്രസിഡൻറ് അലക്സ് തോമസ്

കോടഞ്ചേരി: കൈതപ്പൊയിൽ – അഗസ്ത്യമുഴി റോഡിന്റെ നിർമ്മാണവുമായി ബന്ധപ്പെട്ടു കോടഞ്ചേരി സിഎച്ച്സി – അമ്പാട്ടുപടി റോഡിലെ ശോചനീയാവസ്ഥ അടിയന്തരമായി പരിഹരിക്കണമെന്ന് പഞ്ചായത്ത് പ്രസിഡന്റ് അലക്സ് തോമസ് പിഡബ്ല്യുഡി ഉദ്യോഗസ്ഥരെ നേരിട്ട് വിളിച്ച് ആവശ്യപ്പെട്ടു.
ഈ കോവിഡ് മഹാമാരി കാലഘട്ടത്തിൽ ടെസ്റ്റിനും വാക്സിനേഷനും ആയി നൂറുകണക്കിന് ആളുകളുടെ ആശ്രയമായ ആശുപത്രി പരിസരത്ത് ദിവസവും നിരവധി വാഹനങ്ങൾ ചെളിയിൽ കുടുങ്ങുന്നത് നിത്യസംഭവമാവുകയാണ്.
അടിയന്തരമായി ഈ റോഡിലെ ചെളി പ്രശ്നം പരിഹരിക്കാത്ത പക്ഷം ജനകീയ പങ്കാളിത്തത്തോടെ കൂടി പഞ്ചായത്തിന്റെ നേതൃത്വത്തിൽ ക്വറി വേസ്റ്റിട്ട് യാത്ര സൗകര്യം ഒരുക്കുമെന്ന് വാർത്താക്കുറിപ്പിൽ അറിയിച്ചു.
കാലങ്ങളായി ഇഴഞ്ഞുനീങ്ങുന്ന റോഡ് നിർമ്മാണത്തിന് ഉത്തരവാദികളായ നാഥ് കന്പനിക്കെതിരെ തക്കതായ നടപടികളും ഇന്നാട്ടിലെ സാധാരണക്കാർക്കുണ്ടായ നഷ്ടങ്ങൾ വകയിരുത്തി നഷ്ടപരിഹാരം നൽകുവാനുള്ള നടപടിയും പിഡബ്ല്യുഡിയുടെ ഭാഗത്ത് നിന്നും ഉണ്ടാകണമെന്നും അദ്ദേഹം പറഞ്ഞു






