രാജ്യത്തെ പൊതുമേഖല സ്ഥാപനങ്ങളുടെ എണ്ണം വെട്ടിച്ചുരുക്കാനൊരുങ്ങി കേന്ദ്രസര്ക്കാര്
ന്യൂഡല്ഹി: രാജ്യത്തെ പൊതുമേഖല സ്ഥാപനങ്ങളുടെ എണ്ണം വെട്ടിച്ചുരുക്കാന് കേന്ദ്രസര്ക്കാര് നീക്കം. പൊതുമേഖലയില് നിലനിര്ത്തേണ്ട കമ്പനികളുടെ എണ്ണം കുറയ്ക്കാനാണ് പദ്ധതി.
നിലവിലുള്ള 300 പൊതുമേഖല സ്ഥാപനങ്ങളെ 12 ആക്കി വെട്ടിച്ചുരുക്കാനാണ് കേന്ദ്രസര്ക്കാര് പദ്ധതിയിടുന്നത്. കഴിഞ്ഞ ബജറ്റ് അവതരണവേളയില് സ്വകാര്യവത്കരണ നയത്തെ കുറിച്ച് ധനമന്ത്രി നിര്മ്മല സീതാരാമന് വ്യക്തമാക്കിയിരുന്നു.
രണ്ടു പൊതുമേഖല ബാങ്കുകളും ഒരു ഇന്ഷുറന്സ് കമ്പനിയും ഉള്പ്പെടെ പ്രമുഖ പൊതുമേഖല സ്ഥാപനങ്ങളുടെ ഓഹരികള് വിറ്റഴിക്കുമെന്നാണ് ബജറ്റ് നിര്ദേശിക്കുന്നത്. രാജ്യത്തെ നാല് സുപ്രധാന മേഖലകളില് മാത്രമായി പൊതുമേഖല സ്ഥാപനങ്ങളെ പരിമിതപ്പെടുത്താനാണ് കേന്ദ്രം ഒരുങ്ങുന്നത്. ഓരോ സെക്ടറിലും മൂന്ന് മുതല് നാലു കമ്പനികള് വരെ നിലനിര്ത്തുകയാണ് കേന്ദ്രസര്ക്കാര് ലക്ഷ്യം.
ആണവോര്ജ്ജം, ബഹിരാകാശം, പ്രതിരോധം, ഗതാഗതം, ടെലി കമ്മ്യൂണിക്കേഷന്, ഊര്ജ്ജം, പെട്രോളിയം, കല്ക്കരി, ധാതുലവണങ്ങള്, ബാങ്കിങ്, ഇന്ഷുറന്സ്, ധനകാര്യ സേവനം എന്നിവയാണ് തന്ത്രപ്രധാന മേഖലകളായി കേന്ദ്രസര്ക്കാര് കണക്കാക്കുന്നത്.
