ന്യൂഡൽഹി: തനിക്കും പാർട്ടി നേതൃത്വത്തിനുമെതിരെ ഇടത് എം.എൽ.എ. പി.വി. അൻവർ ഉന്നയിച്ച ആരോപണങ്ങൾ തള്ളുന്നതായി മുഖ്യമന്ത്രി പിണറായി വിജയൻ. ഡൽഹിയിൽ പോളിറ്റ് ബ്യൂറോ യോഗത്തിൽ പങ്കെടുക്കുന്നതിനായി എത്തുമ്പോൾ മാധ്യമങ്ങളോട് പ്രതികരിക്കുകയായിരുന്നു അദ്ദേഹം. പി.വി. അൻവർ ഉന്നയിച്ച ചില ആരോപണങ്ങൾക്കു പിന്നാലെ തന്നെ അതിന് പിന്നിലുള്ള ഉദ്ദേശ്യം എന്താണെന്ന് സംശയമുണ്ടായിരുന്നതായും, അന്വേഷണത്തിന് പാർട്ടി മികച്ച സംവിധാനം ഏർപ്പെടുത്തിയിരുന്നതായും മുഖ്യമന്ത്രി വ്യക്തമാക്കി. അൻവർ ഉന്നയിച്ച ആരോപണങ്ങളെ സംബന്ധിച്ച് വിശദമായ മറുപടി പിന്നീട് നൽകുമെന്നും അദ്ദേഹം കൂട്ടിച്ചേർത്തു. അൻവറുടെ ആരോപണങ്ങൾ എൽ.ഡി.എഫിനെയും സർക്കാരിനെയും അപകീർത്തിപ്പെടുത്താനായാണ്, അത് പ്രചാരണം നടത്താൻ എൽ.ഡി.എഫിന്റെ ശത്രുക്കൾക്ക് സഹായകരമാകുമെന്ന് മുഖ്യമന്ത്രി പറഞ്ഞു. എൽ.ഡി.എഫിൽ നിന്ന് വിട്ടുനിൽക്കാൻ തീരുമാനിച്ചെന്നും പാർലമെന്ററി പാർട്ടിയിൽ പങ്കെടുക്കില്ലെന്നും അൻവർ നേരത്തെ തന്നെ അറിയിച്ചതായും അദ്ദേഹം ചൂണ്ടിക്കാട്ടി. പാർട്ടിക്കും സർക്കാരിനും എൽ.ഡി.എഫിനും എതിരെ അൻവർ ഉന്നയിച്ച എല്ലാ ആരോപണങ്ങളും തള്ളുന്നുവെന്നും, അനുകൂലമായ രീതിയിൽ പരിശോധിച്ച്, അന്വേഷണത്തിന്റെ വിശ്വാസ്യത കാത്തുസൂക്ഷിക്കുമെന്നും മുഖ്യമന്ത്രി പറഞ്ഞു
