താമരശേരിയിൽ ജീപ്പും പിക്കപ്പും കൂട്ടിയിടിച്ച് അപകടം; പിക്കപ്പ് ഡ്രൈവർ മരിച്ചു
താമരശേരി: ജീപ്പും പിക്കപ്പും കൂട്ടിയിടിച്ചു പിക്കപ്പ് ഡ്രൈവർ മരിച്ചു. കൂടത്തായി മുല്ല സോപ്പ് കമ്പനി പാർട്ണർ കൊടുവള്ളി കരീറ്റിപ്പറമ്പ് തുടിയേരിക്കണ്ടി ബഷീർ (35) ആണ് മരണപ്പെട്ടത്. ജീപ്പ് യാത്രക്കാരായ ഏകരൂൽ സ്വദേശികളും ബന്ധുക്കളുമായ അബു, ഹാരിസ്, റിൻഷാ എന്നിവരെ പരിക്കുകളോടെ മെഡിക്കൽ കോളേജിൽ പ്രവേശിപ്പിച്ചിരിക്കുകയാണ്.
ഇന്ന് വൈകുന്നേരം നാലു മണിയോടെ വെഴുപ്പൂർ വൃന്ദാവൻ എസ്റ്റേറ്റിന് മുൻ വശത്തു (വേലായുധൻ പാറക്ക് സമീപം )ആണ് അപകടമുണ്ടായത്. കെഎംസിടി ആശുപത്രിയിൽ നിന്ന് വരികയായിരുന്നു ജീപ്പ് യാത്രക്കാർ. ചുങ്കത്തു നിന്ന് കൂടത്തായിയിലേക്ക് വരികയായിരുന്ന മുല്ല സോപ്പ് കമ്പനിയുടെ പിക്കപ്പ് വാനാണ് അപകടത്തിൽ പെട്ടത്. നാട്ടുകാരും പോലീസും ചേർന്നാണ് അപകടത്തിൽപ്പെട്ടവരെ ആശുപത്രിയിലെത്തിച്ചത്.
ലോക്ക് ഡൗൺ നിയന്ത്രണങ്ങളിൽ ഇളവു വന്നതോടെ നിരവധി വാഹനങ്ങളാണ് നിരത്തിലിറങ്ങുന്നത്. കഴിഞ്ഞ രണ്ടു ദിവസമായി ജില്ലയിലെ റോഡുകളിൽ സാമാന്യം നല്ല വാഹനത്തിരക്കാണ് അനുഭവപ്പെടുന്നത്. ബസുകളും ഓട്ടോകളും ഇതുവരെ ഓടിത്തുടങ്ങിയിട്ടില്ല. അതിനാൽ നിരത്തിൽ സ്വകാര്യ വാഹനങ്ങളുടെ എണ്ണത്തിൽ വർധനവുണ്ടായിട്ടുണ്ട്. ചരക്കു വാഹനങ്ങൾക്ക് പ്രത്യേക പാസിൻ്റെ ആവശ്യമില്ലെന്ന് കളക്ടർ കഴിഞ്ഞ ദിവസം വ്യക്തമാക്കിയിരുന്നു.
