രേഖകളില്ലാത്ത ഒന്നര കോടി രൂപയുമായി രണ്ടുപേരെ കോട്ടക്കൽ പോലീസ് പിടികൂടി
കോട്ടക്കൽ: രേഖകളില്ലാത്ത ഒന്നര കോടി രൂപയുമായി രണ്ടുപേരെ കോട്ടക്കൽ പോലീസ് പിടികൂടി. മിനി ലോറിയിൽ ഒളിപ്പിച്ചു കടത്തുന്നതിനിടെ പുത്തൂർ ചെനക്കൽ ബൈപാസിൽ വച്ചാണ് പ്രതികൾ പോലീസ് പിടിയിലായത്.
കരിങ്കപ്പാറ ഓമച്ചപ്പുഴ മേനാട്ടിൽ അഷ്റഫ്, കോട്ടക്കൽ ചങ്കുവെട്ടിക്കുണ്ട് നന്പിയാടത്ത് അബ്ദുൾ റഹ്മാൻ എന്നിവരെയാണ് പോലീസ് അറസ്റ്റ് ചെയ്തത്. ഇവരിൽ നിന്നും1,53,50,000 രൂപ കണ്ടെടുത്തു.
കോയന്പത്തൂരിൽ നിന്നു ഒഴിഞ്ഞ പഴക്കൂടകളുമായി വരികയായിരുന്ന മിനിലോറിയിലാണ് പണം ഒളിപ്പിച്ചു കടത്തിയത്. രഹസ്യവിവരത്തിന്റെ അടിസ്ഥാനത്തിൽ ജില്ല പോലീസ് മേധാവി സുജിത് ദാസിന്റെ നിർദേശ പ്രകാരം മലപ്പുറം ഡിവൈഎസ്പി കെ. സുദർശൻ, കോട്ടക്കൽ സിഐ എം. സുജിത്ത്, എസ്ഐ അജിത്, പ്രത്യേക അന്വേഷണ സംഘം എന്നിവരാണ് പ്രതികളെ പിടികൂടിയത്.