കോവിഡ് വ്യാപനം രൂക്ഷമായ സാഹചര്യത്തിൽ പരിശോധന കർശനമാക്കി മുക്കം പോലീസ്
മുക്കം:കോവിഡിന്റെ രണ്ടാംഘട്ട വ്യാപനം രൂക്ഷമായ സാഹചര്യത്തിൽ പരിശോധന കർശനമാക്കി മുക്കം പോലീസ്. മുക്കം പോലീസ് സ്റ്റേഷന്റെ പരിധിയിലുള്ള മുക്കം നഗരസഭ, കാരശേരി, കൊടിയത്തൂർ പഞ്ചായത്തുകൾ എന്നിവിടങ്ങളിലാണ് പരിശോധന കർശനമാക്കിയത്. ഇതിന്റെ ഭാഗമായി മുക്കത്തെ കടകളിലും അങ്ങാടിയിലും ഇന്നലെ പോലീസ് പരിശോധന നടത്തി. പൊതു സ്ഥലങ്ങളിൽ എത്തുന്നവർ സാമൂഹിക അകലം കൃത്യമായി പാലിക്കുന്നുണ്ടോയെന്നും മാസ്ക് ധരിക്കുന്നുന്നുണ്ടോയെന്നുമാണ് പ്രധാനമായും പരിശോധിക്കുന്നത്.
കടകളിൽ സാനിറ്റൈസർ ഉൾപ്പെടെയുള്ള പ്രതിരോധ പ്രവർത്തനങ്ങൾ ഒരുക്കിയിട്ടുണ്ടോയെന്നും പരിശോധിക്കുന്നുണ്ട്. ആദ്യഘട്ടമെന്ന നിലയിൽ കടകളിൽ കയറി പരിശോധിക്കുകയും നിർദേശങ്ങൾ നൽകുകയുമാണ് ചെയ്യുന്നത്. തുടർന്ന് കോവിഡ് മാനദണ്ഡങ്ങൾ ലംഘിച്ചാൽ കർശന നിയമ നടപടി സ്വീകരിക്കുമെന്നും പോലീസ് അറിയിച്ചു.
ഇതോടൊന്നിച്ച് മുക്കം നഗരത്തിലും പരിസര പ്രദേശങ്ങളിലും ബോധവത്ക്കരണവും നടന്നു. പോലീസ് പരിശോധനയിൽ എൻ്റെ മുക്കം സന്നദ്ധ സേനാംഗങ്ങളായ സലീം പൊയിലിൽ,ശംസീർ മെട്രോ, എൻ.ശശികുമാർ ,മനാഫ് എന്നിവർ പങ്കാളികളായി. മുക്കം സ്റ്റേഷൻ ഓഫീസറുടെ നിർദേശ പ്രകാരമാണ് പരിശോധന കർശനമാക്കിയത്. ഇന്നലെ മുക്കം അങ്ങാടിയിൽ നടന്ന പരിശോധനയ്ക്ക് പ്രിൻസിപ്പൽ എസ്ഐ കെ. രാജീവൻ, അബ്ദുറഹ്മാൻ, ജനമൈത്രി എസ്ഐ പി.അസൈൻ, ജനമൈത്രി പോലീസ് സിപിഒ സുനിൽ, സിപിഒ അനൂപ്, എച്ച്.ജി.ബിജു അബ്രഹാം എന്നിവർ നേതൃത്വം നൽകി.