അടിവാരം: നിർദിഷ്‌ട ചിപ്പിലിത്തോട്, മരുതിലാവ്-തളിപ്പുഴ ബൈപാസ് യാഥാർഥ്യമാക്കി ചുരത്തിലെ യാത്രാ ദുരിതം പരിഹരിക്കണമെന്നാവശ്യപ്പെട്ട് വയനാട് ചുരം ബൈപാസ് ആക്‌ഷൻ കമ്മിറ്റി ബൈപാസ് നിർമാണ ജനകീയ പ്രതിഷേധ സംഗമം സംഘടിപ്പിച്ചു. കോഴിക്കോട്, വയനാട് ജില്ലയിൽ ആക്‌ഷൻ കമ്മിറ്റിയുമായി സഹകരിച്ചു പ്രവർത്തിക്കുന്ന 30ൽ പരം സംഘടനകളുടെ ഭാരവാഹികൾ ഉൾപ്പെടെ നൂറുകണക്കിനാളുകൾ ജനകീയ സംഗമത്തിലും മുന്നോടിയായി നടന്ന പ്രകടനത്തിലും പങ്കെടുത്തു. അടിവാരത്തു സംഘടിപ്പിച്ച ബൈപാസ് നിർമാണ ജനകീയ സംഗമം താമരശ്ശേരി രൂപത ബിഷപ് മാർ റെമീജിയോസ് ഇഞ്ചനാനിയിൽ ഉദ്ഘാടനം ചെയ്‌തു.
ആക്‌ഷൻ കമ്മിറ്റി ചെയർമാൻ വി.കെ ഹുസൈൻകുട്ടി അധ്യക്ഷത വഹിച്ച ചടങ്ങിൽ ആക്‌ഷൻ കമ്മിറ്റി ജനറൽ കൺവീനർ ടി.ആർ.ഒ കുട്ടൻ, വിവിധ സംഘടന പ്രതിനിധികളായ എം.എ റസാഖ്, വി.എം ഉമ്മർ, ഗിരീഷ് തേവള്ളി, ഗിരീഷ് ജോൺ, അമീർ മുഹമ്മദ് ഷാജി, ജോണി പാറ്റാനി, വൈത്തിരി ഗ്രാമ പഞ്ചായത്ത് സ്ഥിരം സമിതി ചെയർമാൻ എൻ.ഒ ദേവസ്യ, ഫാ. ജോണി ആൻ്റണി, കൊടുവള്ളി ബ്ലോക്ക് പഞ്ചായത്ത് പ്രസിഡന്റ് കെ.എം അഷ്റഫ്, വി.കെ മൊയ്തു മുട്ടായി, ബിജു താന്നിക്കാക്കുഴി, ജ്യോതിഷ് കുമാർ വൈത്തിരി, സൈദ് തളിപ്പുഴ, അഷ്റഫ് വൈത്തിരി, ഗ്രാമ പഞ്ചായത്ത് പ്രസിഡന്റുമാരായ നജ്‌മുന്നീസ ഷെരീഫ്, അലക്‌സ് തോമസ്, ജില്ലാ പഞ്ചായത്ത് മെംബർ അംബിക മംഗലത്ത്, അന്നമ്മ മാത്യു, ഷംസുദ്ദീൻ ചെറുവാടി, സി.എ മുഹമ്മദ് തുടങ്ങിയവർ സംസാരിച്ചു.
