ലോകശ്രദ്ധ നേടിയ ഓമശ്ശേരി അമ്പലക്കണ്ടി വയലിൽ അൻസലും അനുവും; ഫുട്ബോൾ ആവേശത്തിൽ വൈറലായി പ്രീ-വെഡ്ഡിങ് ഷൂട്ട്
മുക്കം: ലോകകപ്പ് ഫുട്ബോളിന്റെ ആവേശം പടരുമ്പോൾ, പ്രണയവും കാൽപ്പന്ത് ഭ്രമവും ഒരുമിച്ച് ചേർത്ത് സോഷ്യൽ മീഡിയയിൽ തരംഗമാകുകയാണ് ഒരു യുവമിഥുനങ്ങൾ. ലോകശ്രദ്ധ നേടിയ ഓമശ്ശേരി അമ്പലക്കണ്ടി വയലിൽ, ഫുട്ബോൾ താരങ്ങളുടെ കട്ടൗട്ടുകളുടെ സാന്നിധ്യത്തിൽ നടത്തിയ ഇവരുടെ ഫുട്ബോൾ പ്രമേയത്തിലുള്ള പ്രീ-വെഡ്ഡിങ് ഷൂട്ടാണ് ഇപ്പോൾ വൈറലാകുന്നത്.
തെക്കുംകുറ്റി സ്വദേശിയായ അൻസലും, കക്കാടംപൊയിൽ സ്വദേശിനിയായ അനുവും ആണ് വിവാഹത്തിന് മുന്നോടിയായി വേറിട്ട ആശയവുമായി ക്യാമറയ്ക്ക് മുന്നിലെത്തിയത്. ഫുട്ബോൾ മൈതാനങ്ങളിലെ ബ്രസീൽ-അർജന്റീന പോരാട്ടത്തിന്റെ ആവേശം അതേപടി പകർത്തിയ ചിത്രങ്ങൾ ഇതിനോടകം തന്നെ ഫുട്ബോൾ ആരാധകരുടെ ഹൃദയം കീഴടക്കിയിരിക്കുകയാണ്.
മഞ്ഞ ജേഴ്സിയിൽ ബ്രസീൽ ആരാധകനായി അൻസൽ എത്തിയപ്പോൾ, അർജന്റീനയുടെ നീല-വെള്ളി വരകളുള്ള ജേഴ്സിയിൽ അനു തിളങ്ങി. അമ്പലക്കണ്ടി വയലിൽ ഉയർന്നുനിൽക്കുന്ന മെസ്സിയുടെ ഭീമൻ കട്ടൗട്ടിന് മുന്നിൽ, കൈയിൽ ഫുട്ബോൾ പിടിച്ച് കൈകോർത്തുനിൽക്കുന്ന ഇരുവരുടെയും ചിത്രങ്ങൾ സിനിമാറ്റിക് ഭംഗിയോടെ ശ്രദ്ധ പിടിച്ചുപറ്റുകയാണ്.
പ്രണയവും മത്സരവീര്യവും ഒരുമിച്ച് കോർത്തിണക്കിയ ഈ മനോഹര നിമിഷങ്ങൾ ക്യാമറയിൽ പകർത്തിയത് പ്രമുഖ ഫോട്ടോഗ്രഫി ബ്രാൻഡായ ഫോട്ടോക്കാരൻ – വെഡിങ് ഫോട്ടോഗ്രാഫിയാണ്.
ഈ മാസം 18-ാം തീയതിയാണ് അൻസാലിന്റെയും അനുവിന്റെയും വിവാഹം. വിവാഹത്തിന് ദിവസങ്ങൾ മാത്രം ബാക്കിയിരിക്കെ പുറത്തുവന്ന ഈ ‘ഫുട്ബോൾ പ്രീ-വെഡ്ഡിങ്’ ഷൂട്ട് സോഷ്യൽ മീഡിയയിൽ വൻ ശ്രദ്ധ നേടുകയാണ്. കളിയിൽ ബ്രസീലും അർജന്റീനയും നേർക്കുനേർ എത്തിയാലും, ജീവിതമെന്ന കളിയിൽ ഒരേ ടീമായി മുന്നേറാൻ ഒരുങ്ങുന്ന ഈ ദമ്പതികൾക്ക് ആശംസകളുടെ പ്രവാഹമാണ് ഇപ്പോൾ ലഭിക്കുന്നത്.
