തിരുവമ്പാടി: തിരുവമ്പാടി ഗ്രാമപഞ്ചായത്തിലെ ഒന്നാം വാർഡ് മുത്തപ്പൻപുഴ പ്രദേശത്തെ ഭൂപ്രശ്നത്തിനു പരിഹാരമാകുന്നു. 60-വർഷത്തിലധികമായി കൈവശം വെച്ച് കൃഷി ചെയ്യുന്ന 476 കുടുംബങ്ങളുടെ ഭൂമി വനം വകുപ്പിന് വിട്ടുകൊടുക്കണം എന്നതാണ് നിലനിൽക്കുന്ന വിഷയം. 1968 മുതൽ കർഷകർ നികുതി അടച്ച് വീട് വെച്ച് സ്ഥിരതാമസമാക്കിയ ഭൂമിയാണ് വനം വകുപ്പ് യാതൊരു വിധ ആലോചനയും കൂടാതെ അടിയന്തിരാവസ്ഥക്കാലത്ത് വനഭൂമിയായി പ്രഖ്യാപിച്ചത്.
വിഷയം സംബന്ധിച്ച് കർഷക സംഘം തിരുവമ്പാടി ഏരിയാ കമ്മറ്റി ലിൻ്റോ ജോസഫ് എം.എൽ.എ മുഖാന്തിരം വനം – റവന്യൂ വകുപ്പ് മന്തിമാർക്ക് കൊടുത്ത നിവേദന പ്രകാരം നടന്ന ചർച്ചയിലാണ് കർഷകരുടെ ആശങ്കകൾ പരിഹരിക്കാനുള്ള നടപടി യുടെ ഭാഗമായി ജോയിൻ്റ് വെരിഫിക്കേഷനു തീരുമാനമായത്. വനം വകുപ്പ് ഉദ്യോഗസ്ഥരും റെവന്യൂ വകുപ്പ് ഉദ്യോഗസ്ഥരും ജനപ്രതിനിധികളും സംയുക്തമായ സ്ഥലം സന്ദർശിക്കുകയും എല്ലാ രേഖകളും പരിശോധിക്കുകയും ചെയ്യും. അതിനു മുമ്പായി ജില്ലാ കളക്ടർ സ്ഥലം സന്ദർശിച്ച് മന്ത്രിമാർക്ക് റിപ്പോർട്ട് നൽകണം. വനം – റവന്യൂ വകുപ്പ് മന്ത്രിമാരുമായുള്ള ചർച്ചയിൽ ലിൻ്റോ ജോസഫ് എം.എൽ.എ,
കർഷക സംഘം ഏരിയാ സെക്രട്ടറി ജോളി ജോസഫ്,
തോമസ് തെക്കേക്കറ്റ്, തോമസ് ആനക്കല്ലേൽ, കർഷക പ്രതിനിധികൾ തുടങ്ങിയവർ പങ്കെടുത്തു.
