കോടഞ്ചേരി: വേളംകോട് സെന്റ് ജോർജ്സ് ഹയർ സെക്കൻഡറി സ്കൂളിലെ നാഷണൽ സർവീസ് സ്കീം (NSS) യൂണിറ്റിന്റെയും സ്കൗട്ട് ആൻഡ് ഗൈഡ്സ് യൂണിറ്റിന്റെയും നേതൃത്വത്തിൽ വിദ്യാർത്ഥികളിൽ നിന്ന് സമാഹരിച്ച ധനസഹായം കോടഞ്ചേരി പെയിൻ ആൻഡ് പാലിയേറ്റീവ് യൂണിറ്റിന് കൈമാറി.
സ്കൂളിൽ നടന്ന ചടങ്ങിൽ കോടഞ്ചേരി പെയിൻ ആൻഡ് പാലിയേറ്റീവ് യൂണിറ്റ് പ്രസിഡന്റ് ജോസഫ് പാലക്കൽ, സെക്രട്ടറി ജോസ് പട്ടേരിയിൽ, ഭരണസമിതി അംഗം പി. എം. മത്തായി എന്നിവർ ചേർന്ന് വിദ്യാർത്ഥികളുടെ ഭാഗത്തുനിന്നുള്ള ധനസഹായം ഏറ്റുവാങ്ങി.
സമൂഹത്തിലെ വേദന അനുഭവിക്കുന്നവർക്കും ദീർഘകാല പരിചരണവും പിന്തുണയും ആവശ്യമായ രോഗികൾക്കും ആശ്വാസമേകുന്ന പാലിയേറ്റീവ് പ്രവർത്തനങ്ങൾക്ക് വിദ്യാർത്ഥികൾ നൽകിയ ഈ സഹായം ഏറെ വിലമതിക്കാനാവാത്തതാണെന്ന് ഭാരവാഹികൾ പറഞ്ഞു. വിദ്യാർത്ഥികളിൽ സാമൂഹിക പ്രതിബദ്ധത, കരുണ, സഹാനുഭൂതി, സേവന മനോഭാവം എന്നിവ വളർത്തുക എന്ന ലക്ഷ്യത്തോടെ NSS, സ്കൗട്ട് ആൻഡ് ഗൈഡ്സ് യൂണിറ്റുകൾ നടത്തിവരുന്ന വിവിധ സേവന പ്രവർത്തനങ്ങളുടെ ഭാഗമായാണ് ധനസമാഹരണം നടത്തിയത്.
ചടങ്ങിൽ സ്കൂൾ അധികൃതർ, അധ്യാപകർ, NSS പ്രോഗ്രാം ഓഫീസർ, സ്കൗട്ട് ആൻഡ് ഗൈഡ്സ് ഭാരവാഹികൾ, വിദ്യാർത്ഥികൾ എന്നിവർ സംബന്ധിച്ചു.
