മുക്കം : റോഡരികിൽ നിർമിച്ച സുരക്ഷാഭിത്തികൾക്കിടയിൽ കണ്ണിന് കുളിർമയേകി ചെണ്ടുമല്ലിക്കൃഷി. സമീപത്ത് ചാക്കുകളിൽ വളരുന്ന ചേനയും പച്ചക്കറികളും. ഇവയ്ക്ക് വളമാകുന്നത് കഫ്തീരിയയിലെ മാലിന്യവും. വൈകുന്നേരങ്ങളിൽ വിദ്യാർഥികളും വയോജനങ്ങളും ഉൾപ്പെടെയുള്ളവർ ഇവിടെയെത്തി കൃഷിയുടെ ഭാഗമാകുന്നു. മണാശ്ശേരി-ചേന്ദമംഗല്ലൂർ റോഡിലെ പൊറ്റശ്ശേരിയിൽ ബഷീർ അമ്പലത്തിങ്കൽ ഒരുക്കിയിരിക്കുന്ന കൃഷിയിടം ഇപ്പോൾ നാട്ടുകാർക്ക് കൗതുകക്കാഴ്ച മാത്രമല്ല, കൃഷിയുടെയും ശുചിത്വത്തിന്റെയും പുതിയൊരു മാതൃക കൂടിയാണ്.
കൃഷിയോടുള്ള ബഷീറിെൻറ താത്പര്യവും പുതുമ പരീക്ഷിക്കാനുള്ള മനസ്സുമാണ് റോഡരികിനെ മനോഹരമായ കൃഷിയിടമാക്കിയത്. സ്വന്തം കോഫി ഷോപ്പിന് സമീപമാണ് ബഷീറിന്റെ ഈ പരീക്ഷണം. ചായപ്പൊടി, മുട്ടത്തോട്, ഭക്ഷണാവശിഷ്ടങ്ങൾ തുടങ്ങിയ ജൈവമാലിന്യങ്ങൾ ശേഖരിച്ച് സംസ്കരിച്ച് വളമാക്കുന്നു. ഈ ജൈവവളം ഉപയോഗിച്ചാണ് ചാക്കുകളിൽ ചേനയും ചെണ്ടുമല്ലിയും ഉൾപ്പെടെയുള്ള കൃഷികൾ നടത്തുന്നത്.
റോഡിന്റെ ഇരുവശങ്ങളിലുമായി നിരന്നുനിൽക്കുന്ന പൂച്ചെടികളും പച്ചക്കറിച്ചെടികളും വഴിയാത്രക്കാർക്ക് കൗതുകക്കാഴ്ചയാണ്. മുക്കം കൃഷി ഓഫീസർ കെ.എ. ഷബീർ അഹമ്മദിന്റെ നിർദേശ പ്രകാരമാണ് ബഷീർ വഴിയോര കൃഷി ആരംഭിച്ചത്. മുക്കം കൃഷി ഭവന്റെ പൂർണ സാമ്പത്തിക-സാങ്കേതിക പിന്തുണയും കൃഷിക്കുണ്ട്. ആവശ്യമായ സഹായങ്ങളുമായി കൃഷിഭവനിലെ സി.വി. സതിയും കൃഷി അസിസ്റ്റന്റുമാരായ എം. റീപ്പയും പി.പി. ദിവ്യയും ബഷീറിനൊപ്പമുണ്ട്.
