മുക്കം: മാമ്പറ്റ പ്രതീക്ഷ സ്പെഷ്യൽ സ്കൂളിൽ ഭിന്നശേഷിക്കാരായ കുട്ടികൾക്കായി സംഘടിപ്പിച്ച കായികോത്സവം ‘അറ്റ്‌ലേറ്റിക്ക 2k26’ ആവേശകരമായി നടന്നു.മുക്കം ഫയർസ്റ്റേഷൻ ഓഫീസർ യു.പി. അബ്ദുസലിം പരിപാടിയുടെ ഉദ്ഘാടനം നിർവ്വഹിച്ചു.
മുക്കം നഗരസഭ വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ മനീഷ ഉള്ളാട്ടിൽ ചടങ്ങിൽ മുഖ്യാതിഥിയായിരുന്നു. സ്കൂൾ കമ്മിറ്റി പ്രസിഡന്റ് സിദ്ധിക് പുറായിൽ അധ്യക്ഷത വഹിച്ച ഉദ്ഘാടനച്ചടങ്ങിൽ ഹെഡ്മിസ്ട്രസ് കെ. ഷീബ, കെ. വിജയൻ, എ.എം. ജമീല, പി.ടി.എ. പ്രസിഡന്റ് അസീസ് മലയമ്മ, സി. ഹാരിസ്, പ്രഭാകരൻ ടി. എന്നിവർ ആശംസകൾ നേർന്നു സംസാരിച്ചു.
ഡോൺബോസ്കോ കോളേജ് എൻ.എസ്.എസ്. (NSS) യൂണിറ്റിലെ വളണ്ടിയർമാരുടെ സജീവ സഹകരണത്തോടെ, സ്പെഷ്യൽ ഒളിമ്പിക്സ് കായിക മത്സരങ്ങളുടെ നിയമങ്ങൾ പൂർണ്ണമായും പാലിച്ചുകൊണ്ടാണ് വിവിധ മത്സരയിനങ്ങൾ അരങ്ങേറിയത്. മത്സരത്തിൽ വിജയികളായവർക്ക് ഡോൺബോസ്കോ കോളേജ് പ്രിൻസിപ്പൽ ഫാ. ജോബി എം. ജേക്കബ് മെഡലുകൾ സമ്മാനിച്ചു.ചടങ്ങിനും മത്സരങ്ങൾക്കും സ്കൂൾ അധ്യാപകരായ സന്ധ്യ ടി.എൻ., പുഷ്പവല്ലി സി., ലസിത കെ., നിഷ കെ., ഉഷ കെ.സി., അനിത കെ., ബിന്ദു ടി.കെ., രജി കെ. എന്നിവർ നേതൃത്വം നൽകി.
