തിരു തില്ലാന’ മുക്കം ഉപജില്ലാ കലോത്സവം: സ്റ്റേജ് മത്സരങ്ങൾക്ക് തിരുവമ്പാടിയിൽ ഇന്ന് തുടക്കം
തിരുവമ്പാടി:ആവേശകരമായ മുക്കം ഉപജില്ലാ സ്കൂൾ കലോത്സവത്തിന് (‘തിരു തില്ലാന’) തിരുവമ്പാടിയിൽ ഇന്ന് ഔദ്യോഗികമായി തിരിതെളിയുന്നു. മൂന്ന് ദിവസങ്ങളിലായി നടക്കുന്ന കലോത്സവത്തിന്റെ സ്റ്റേജ് മത്സരങ്ങളാണ് ഇന്ന് മുതൽ തിരുവമ്പാടിയിൽ അരങ്ങേറുന്നത്.
പ്രധാന വേദിയായ തിരുവമ്പാടി സേക്രഡ് ഹാർട്ട് ഹയർ സെക്കൻഡറി സ്കൂളിന് പുറമെ സേക്രഡ് ഹാർട്ട് യു.പി. സ്കൂൾ, ഇൻഫന്റ് ജീസസ് ഇംഗ്ലീഷ് മീഡിയം സ്കൂൾ എന്നീ പ്രധാന കേന്ദ്രങ്ങളിലായി ഒരുക്കിയ 15 വേദികളിലാണ് മത്സരങ്ങൾ നടക്കുന്നത്. ഉപജില്ലയിലെ വിവിധ വിദ്യാലയങ്ങളിൽ നിന്നുള്ള ആറായിരത്തോളം പ്രതിഭകളാണ് ഇത്തവണ കലോത്സവത്തിൽ മാറ്റുരയ്ക്കുന്നത്.
ഇന്ന് രാവിലെ 9:30-ന് നടക്കുന്ന ഔദ്യോഗിക ഉദ്ഘാടനച്ചടങ്ങിൽ തിരുവമ്പാടി എം.എൽ.എ. സി.കെ. കാസിം കലോത്സവം ഉദ്ഘാടനം ചെയ്യും. നവംബർ 9, 10, 11 തീയതികളിലായി നടക്കുന്ന മേളയുടെ സമാപന സമ്മേളനം കോഴിക്കോട് ജില്ലാ പഞ്ചായത്ത് പ്രസിഡന്റ് മില്ലി മോഹൻ ഉദ്ഘാടനം ചെയ്യും.കലോത്സവത്തിന്റെ ഭാഗമായി കഴിഞ്ഞ ദിവസങ്ങളിൽ നടന്ന വർണ്ണാഭമായ വിളംബര ജാഥയും പന്തൽ കാൽനാട്ടൽ കർമ്മവും ഏറെ ജനപങ്കാളിത്തം കൊണ്ട് ശ്രദ്ധേയമായിരുന്നു. മലയോരത്തിന്റെ സർഗ്ഗാത്മകത വിളിച്ചോതുന്ന മേളയെ വരവേൽക്കാനുള്ള തയ്യാറെടുപ്പിലാണ് നാടും സംഘാടകരും.
