കാരുണ്യത്തിന്റെ കൈത്താങ്ങായി ബിരിയാണി ചലഞ്ച്; SMA ബാധിച്ച കുരുന്നുകളുടെ ചികിത്സയ്ക്കായി ₹1,60,010 കൈമാറി
അത്തിപ്പാറ: SMA (Spinal Muscular Atrophy) എന്ന അപൂർവ രോഗം ബാധിച്ച മൂന്ന് കുരുന്നുകളുടെ ജീവൻ രക്ഷാ ചികിത്സയ്ക്ക് കൈത്താങ്ങാകാൻ അത്തിപ്പാറ കൂട്ടായ്മ സംഘടിപ്പിച്ച ബിരിയാണി ചലഞ്ച് വിജയകരമായി സമാപിച്ചു.
സമൂഹത്തിന്റെ കൂട്ടായ്മയും മനുഷ്യസ്നേഹവും വിളിച്ചോതിയ പരിപാടിയിലൂടെ സമാഹരിച്ച ₹1,60,010 (ഒരു ലക്ഷത്തി അറുപതിനായിരത്തി പത്ത് രൂപ) ചികിത്സാ സഹായ കമ്മിറ്റിക്ക് ഔദ്യോഗികമായി കൈമാറി.നാടിന്റെ നാനാഭാഗത്തുനിന്നുമുള്ള ജനങ്ങളുടെയും സുമനസ്സുകളുടെയും സജീവമായ പങ്കാളിത്തമാണ് ഈ കാരുണ്യയജ്ഞം ഇത്രത്തോളം വിജയകരമാക്കിയത്. ലഭിച്ച മുഴുവൻ തുകയും ഒരു രൂപ പോലും കുറവില്ലാതെ ചികിത്സാ സഹായ കമ്മിറ്റിയുടെ അക്കൗണ്ടിലേക്കും ചുമതലക്കാരിലേക്കും കൈമാറി.
അപൂർവ രോഗബാധിതരായ കുരുന്നുകൾക്ക് ആശ്വാസമേകാനും അവരുടെ ചികിത്സാ ചെലവുകൾ കണ്ടെത്താനും ഈ നാട് ഒറ്റക്കെട്ടായി ഒപ്പമുണ്ടെന്നതിന്റെ പ്രഖ്യാപനമായി മാറി അത്തിപ്പാറ കൂട്ടായ്മയുടെ ഈ മാതൃകാപരമായ പ്രവർത്തനം.
