ന്യൂഡല്ഹി: രാജ്യത്ത് ലോക്ക് ഡൗണ് മെയ് 31 വരെ നീട്ടാന് തീരുമാനമായി. ഭൂരിപക്ഷം സംസ്ഥാനങ്ങളും ലോക്ക് ഡൗണ് നീട്ടണമെന്ന് ആവശ്യപ്പെട്ട പശ്ചാത്തലത്തിലാണ് ഇത്തരമൊരു തീരുമാനം കൈക്കൊണ്ടിരിക്കുന്നത്. കേന്ദ്ര ആഭ്യന്തരമന്ത്രാലയം ഇത് സംബന്ധിച്ച ഉത്തരവ് ഇന്ന് പുറത്തിറക്കുമെന്നാണ് റിപ്പോര്ട്ട്.
അതേസമയം നാലാം ഘട്ടത്തില് ലോക്ക് ഡൗണിന്റെ ലക്ഷ്യത്തെ ബാധിക്കാത്ത ഇളവുകള് നല്കുമെന്നാണ് സൂചന. എന്നാല് ആഭ്യന്തര വിമാന സര്വീസുകള് പുനഃസ്ഥാപിക്കുന്ന വിഷയത്തില് അഭിപ്രായ ഭിന്നത നിലനില്ക്കുന്നുണ്ട്. സര്വീസുകള് ഇപ്പോള് പുനസ്ഥാപിക്കേണ്ട എന്നാണ് വിവിധ സംസ്ഥാനങ്ങള് കേന്ദ്രത്തോട് ആവശ്യപ്പെട്ടിരിക്കുന്നത്. എന്നാല് ആഭ്യന്തര വിമാന സര്വീസുകള് പുനഃസ്ഥാപിക്കാന് സമയമായെന്നാണ് വ്യോമയന മന്ത്രാലയം അഭിപ്രായപ്പെട്ടത്.
മെയ് 18 ന് ശേഷം വിമാന സര്വീസ് ആരംഭിക്കാനുള്ള വിമാന കമ്പനികളുടെ അപേക്ഷ അംഗീകരിക്കാന് അനുവദിക്കണമെന്നും ആവശ്യപ്പെട്ടിട്ടുണ്ട്. അതേസമയം ഈ വിഷയത്തില് അന്തിമ തിരുമാനം പ്രധാനമന്ത്രി കൈക്കൊള്ളട്ടെ എന്നാണ് ആഭ്യന്തരമന്ത്രാലയം വ്യക്തമാക്കിയത്. അതേസമയം മെട്രോ സര്വീസുകള് മെയ് 30 വരെ ഉണ്ടാകില്ല. കേന്ദ്ര നഗരവികസന മന്ത്രാലയത്തിന്റേതാണ് ഈ തിരുമാനം. മെട്രോ സര്വീസുകള് 17 ന് ശേഷം പുനഃസ്ഥാപിക്കാനുള്ള വിവിധ സംസ്ഥാനങ്ങളുടെ അപേക്ഷയും തള്ളി.
