കൂടരഞ്ഞി: നാല് ദിവസം മുൻപ് പെരുമ്പൂളയിലെ കിണറ്റിൽ വീണത് പുലി തന്നെയെന്ന് വനം വകുപ്പ് ഇന്നലെ സ്ഥിരീകരിച്ചിരുന്നു. കിണറ്റിൽ സ്ഥാപിച്ച ക്യാമറയിൽ പുലിയുടെ ദൃശ്യം പതിഞ്ഞതിനെ തുടർന്ന് ഇന്നലെ കിണറ്റിൽ കൂടിറക്കിയിരുന്നു. ദിവസങ്ങളായി കിണറ്റിനുള്ളിലെ മാള ത്തിലൊളിച്ച പുലിയാണ് വനം വകുപ്പിന്റെ കൂടിൽ കുടുങ്ങിയത്.തുടർന്ന് പുലിയെ താമരശ്ശേരി ഫോറസ്റ്റ് ഓഫീസിലേക്ക് എത്തിച്ചു. പുലി പൂർണ ആരോഗ്യവാൻ ആണെന്ന് വനംവകുപ്പ് അറിയിച്ചു.
കിണറ്റിൽ പുലി ഉണ്ടെന്നും ഇല്ലെന്നുമുള്ള അഭിവ്യൂഹങ്ങൾക്കിടെയാണ് പുലിയുടെ ദൃശ്യം ക്യാമറയിൽ പതിഞ്ഞത്. പ്രദേശത്ത് വന്യമൃഗശല്യം രൂക്ഷമാണെന്നും ജനങ്ങളുടെ സുരക്ഷ ഉറപ്പാക്കാനാവശ്യമായ നടപടി സർക്കാർ സ്വീകരിക്കണമെന്നും നാട്ടുകാർ ആവശ്യപ്പെട്ടു. പുലിയുടെ സാന്നിധ്യം സ്ഥിരീകരിച്ചതോടെ മലയോര മേഖല ആശങ്കയിലാണ്.
