മുക്കം: സമൂഹത്തിലെ പാർശ്വവൽക്കരിക്കപ്പെട്ടവർക്കും യുവജനങ്ങൾക്കും വരുമാനം ഉറപ്പ് വരുത്തുന്നതിന് വേണ്ടി കുടുംബശ്രീ സംസ്ഥാന മിഷൻ നഗരസഭകളിൽ നടപ്പാക്കുന്ന ‘ഒപ്പം’ ക്യാമ്പയിന് മുക്കം നഗരസഭയിൽ തുടക്കമായി. അതിദരിദ്രകുടുംബങ്ങൾ, അഗതിരഹിത കേരളം പദ്ധതി ഗുണഭോക്തൃ കുടുംബങ്ങൾ, പി.എം.എ.വൈ ലൈഫ് ഗുണഭോക്തൃ കുടുംബങ്ങൾ, ഓക്സിലറി ഗ്രൂപ്പ് അംഗങ്ങൾ എന്നിവരിൽ നിന്ന് അർഹരായവരെ കണ്ടെത്തി പരിശീലനം നല്കി തൊഴിൽ ലഭ്യമാക്കുക എന്നതാണ് ക്യാമ്പയിൻറെ ലക്ഷ്യം.
ക്യാമ്പയിൻ നഗരസഭാതല ഉദ്ഘാടനം ഡെപ്യൂട്ടി ചെയർപേഴ്സൺ അഡ്വ. ചാന്ദ്നി നിർവ്വഹിച്ചു. സി.ഡി.എസ് ചെയർ പേഴ്സൺ രജിത സി.ടി അദ്ധ്യക്ഷത വഹിച്ചു. ക്ഷേമകാര്യ സ്റ്റാൻറിംഗ് കമ്മിറ്റി ചെയർമാൻ കുഞ്ഞൻ വി ഒപ്പം ക്യാമ്പയിൻ വിശദീകരണം നൽകി. ബ്ലോക്ക് വ്യവസായ ഓഫീസർ വിപിൻദാസ് ക്ലാസ് നയിച്ചു. ക്യാമ്പയിന്റെ ഭാഗമായി ഡിസംബർ 15 മുതൽ ഫെബ്രുവരി 29 വരെ വിവിധ പ്രവർത്തനങ്ങൾ നഗരസഭയിൽ നടക്കും. അർഹരായ ആളുകളെ കണ്ടെത്തി പരിശീലനം നൽകി വരുമാനാധിഷ്ഠിത തൊഴിലിലേക്കും സ്വയം തൊഴിലിലേക്കും ഉൾച്ചേർക്കും.
20 വർഷമായി നഗരസഭയിൽ വിജയകരമായി പ്രവർത്തിക്കുന്ന കുടുംബശ്രീ സംരംഭമായ ഫ്രൻറ്സ് ഹോട്ടലിനെ യോഗത്തിൽ ആദരിച്ചു. സംരംഭങ്ങൾക്കുള്ള റിസിലയൻസ് ഫണ്ടും സർട്ടിഫിക്കറ്റും ചടങ്ങിൽ വിതരണം ചെയ്തു.
