മുക്കം : ഹയർസെക്കൻഡറി ഇംപ്രൂവ്മെൻറ് പരീക്ഷയുടെ പിറ്റേന്ന് ഉപജില്ലാ കലോത്സവം നടത്തുന്നതിൽ ആശങ്കയുന്നയിച്ച് പ്ലസ്ടു വിദ്യാർഥികളും രക്ഷിതാക്കളും.
നവംബർ ഒന്ന്, രണ്ട് തീയതികളിൽ തിരുവമ്പാടി ഹയർസെക്കൻഡറി സ്കൂളിലാണ് ഈ വർഷത്തെ മുക്കം സബ്ജില്ലാ കലോത്സവം. ഒക്ടോബർ 25 മുതൽ 29 വരെയായിരുന്നു ഇംപ്രൂവ്മെൻറ് പരീക്ഷ നിശ്ചയിച്ചിരുന്നത്. എന്നാൽ, 28-ന് നടക്കേണ്ടിയിരുന്ന പ്ലസ് വൺ ഇംപ്രൂവ്മെൻറ് പരീക്ഷ 31-ലേക്ക് മാറ്റി.
ഇംപ്രൂവ്മെൻറ് പരീക്ഷ എഴുതുന്ന വിദ്യാർഥികളിൽ ഒട്ടേറെപ്പേർ വിവിധ ഇനങ്ങളിൽ മത്സരിക്കാനും പേരുനൽകിയിരുന്നു. എന്നാൽ, ഒപ്പന, കോൽക്കളി ഉൾപ്പെടെയുള്ള ഗ്രൂപ്പ് ഇനങ്ങളിൽ പരിശീലനത്തിന് സമയംകിട്ടില്ലെന്നാണ് വിദ്യാർഥികളുടെ പരാതി.
എല്ലാ വിദ്യാർഥികൾക്കും പങ്കെടുക്കാൻ കഴിയുന്നരീതിയിൽ കലോത്സവതീയതി പുനർനിശ്ചയിക്കണമെന്ന് വിദ്യാർഥികളും രക്ഷിതാക്കളും പറയുന്നു.
