തിരുവമ്പാടി ഗ്രാമപഞ്ചായത്തിൽ ആഗോള കൈകഴുകൽ ദിനം വിപുലമായി ആചരിച്ചു

തിരുവമ്പാടി: തിരുവമ്പാടി ഗ്രാമപഞ്ചായത്ത് ആഗോള കൈകഴുകൽ ദിനാചരണം വിപുലമായ പരിപാടികളോടെ സംഘടിപ്പിച്ചു. കുടുംബാരോഗ്യകേന്ദ്രത്തിന്റെയും ഐസിഡിഎസ് തിരുവമ്പാടിയുടെയും സംയുക്താഭിമുഖ്യത്തിൽ ആണ് പരിപാടി സംഘടിപ്പിച്ചത്.
രോഗങ്ങൾ തടയുന്നതിനും ജീവൻ രക്ഷിക്കുന്നതിനും സോപ്പ് ഉപയോഗിച്ച് കൈകഴുകൽ ഏറ്റവും എളുപ്പവും ഫലപ്രദവുമായ മാർഗമാണെന്ന സന്ദേശം പ്രചരിപ്പിക്കുന്നതിനാണ് ഗ്ലോബൽ ഹാൻഡ് വാഷിംഗ് ഡേ ആചരിക്കുന്നത്.
മറിയപ്പുറം അംഗനവാടിയിൽ നടന്ന പഞ്ചായത്തുതല പരിപാടി ഗ്രാമപഞ്ചായത്ത് വൈസ് പ്രസിഡന്റ് കെ. എ. അബ്ദുറഹിമാൻ ഉദ്ഘാടനം ചെയ്തു. ഐസിഡിഎസ് സൂപ്പർവൈസർ ചഷമ ചന്ദ്രൻ അധ്യക്ഷനായിരുന്നു. ‘വൃത്തിയുള്ള കൈകൾ എന്തുകൊണ്ട് പ്രാധാന്യമർഹിക്കുന്നു’ എന്ന വിഷയത്തിൽ ഹെൽത്ത് ഇൻസ്പെക്ടർ എം. സുനീർ ബോധവൽക്കരണ ക്ലാസ്സ് എടുത്തു.
പരിപാടിയുടെ ഭാഗമായി സെൽഫി കോർണർ, പോസ്റ്റർ പ്രദർശനം, കൈകഴുകലിന്റെ പ്രാധാന്യം വിശദീകരിക്കുന്ന വിവിധ കലാപരിപാടികളും അരങ്ങേറി. കൂടാതെ, പഞ്ചായത്തിലെ സ്കൂളുകളിലും അംഗനവാടികളിലും ബോധവൽക്കരണ പരിപാടികളും വിദ്യാർത്ഥികളുടെ കലാപരിപാടികളും നടന്നു.
ജനപ്രതിനിധികൾ, ആരോഗ്യ പ്രവർത്തകർ, ഐസിഡിഎസ് പ്രവർത്തകർ, ആശ പ്രവർത്തകർ, രക്ഷിതാക്കൾ എന്നിവർ പരിപാടിക്ക് നേതൃത്വം നൽകി. പി.എച്ച്.എൻ. ഷില്ലി എൻ.വി, കൗൺസിലർ ഷംസിയ, ജൂനിയർ ഹെൽത്ത് ഇൻസ്പെക്ടർമാരായ പി.പി. മുഹമ്മദ് ഷമീർ, കെ. ഷാജു, മുഹമ്മദ് മുസ്തഫ ഖാൻ, ശരണ്യ ചന്ദ്രൻ, യു.കെ. മനീഷ, അംഗനവാടി ടീച്ചർ ബിന്ദു എന്നിവർ സംസാരിച്ചു.