കൊടിയത്തൂരിൽ അതിഥി തൊഴിലാളികളുടെ കൃത്യമായ വിവരശേഖരണത്തിന് വിവിധ പദ്ധതികളുമായി ഗ്രാമപഞ്ചായത്ത്
കൊടിയത്തൂർ: അതിഥി തൊഴിലാളികളുടെ കൃത്യമായ വിവരശേഖരണം നടത്തുന്നതിന് കൊടിയത്തൂർ ഗ്രാമപഞ്ചായത്ത് വിവിധ പദ്ധതികളുമായി മുന്നോട്ട് പോവുന്നു. സംസ്ഥാനത്തിൻ്റെ വിവിധ ഭാഗങ്ങളിൽ അതിഥി തൊഴിലാളികൾ ഉൾപ്പെട്ട മദ്യ-മയക്കുമരുന്ന് കേസുകൾ ഉൾപ്പെടെ വർധിച്ചതും, കൊലപാതകവും കവർച്ചയും പോലെയുള്ള കുറ്റകൃത്യങ്ങൾ റിപ്പോർട്ട് ചെയ്യപ്പെട്ടതും ഈ നടപടികൾക്ക് പിന്നിലെ പ്രേരകമാണ്.
തൊഴിലാളികൾ താമസിക്കുന്ന കെട്ടിട ഉടമകളുടെ യോഗം കൊടിയത്തൂർ കുടുംബാരോഗ്യ കേന്ദ്രത്തിൽ നടന്നു. ഗ്രാമ പഞ്ചായത്ത് പ്രസിഡൻറ് ദിവ്യ ഷിബു അധ്യക്ഷയായി ചേർന്ന യോഗത്തിൽ, തൊഴിലാളികളുടെ വാസസ്ഥലങ്ങളിൽ മലിനീകരണവും ആരോഗ്യ പ്രശ്നങ്ങളും ചർച്ച ചെയ്തു.
തൊഴിലാളികൾ താമസിക്കുന്ന കെട്ടിടങ്ങളുടെ പരിസരം വൃത്തിയായി സൂക്ഷിക്കേണ്ടതിന്റെ ആവശ്യകത ഉടമകൾക്ക് ബോധ്യപ്പെടുത്തി. മാലിന്യമുക്ത നവകേരളം ക്യാമ്പിന്റെ ഭാഗമായുള്ള സർക്കാർ നിർദേശങ്ങളും ഉത്തരവുകളും കൃത്യമായി പാലിക്കണമെന്ന് കർശന നിർദ്ദേശം നൽകി.
പഞ്ചായത്ത് പരിധിയിലെ മുഴുവൻ അതിഥി തൊഴിലാളികളുടെയും വിവരങ്ങൾ രജിസ്റ്റർ ചെയ്യണമെന്നും, രജിസ്റ്റർ ചെയ്യാത്ത തൊഴിലാളികളെ താമസിപ്പിക്കാൻ പാടില്ലെന്നും തീരുമാനമായി. കൂടാതെ, തൊഴിലാളികൾക്കായി അങ്ങാടികൾ കേന്ദ്രീകരിച്ച് ആരോഗ്യ ശുചിത്വം, ലഹരി ഉപയോഗം, കുറ്റകൃത്യങ്ങൾ എന്നിവയുമായി ബന്ധപ്പെട്ട ബോധവൽക്കരണ ക്ലാസുകൾ സംഘടിപ്പിക്കാനും തീരുമാനിച്ചു.
യോഗത്തിൽ ആരോഗ്യ സ്റ്റാൻഡിങ് കമ്മിറ്റി ചെയർപേഴ്സൺ മറിയംകുട്ടി ഹസ്സൻ, ക്ഷേമകാര്യ സ്റ്റാൻഡിങ് കമ്മിറ്റി ചെയർമാൻ ബാബു പൊലു കുന്നത്ത്, മെമ്പർമാരായ ടി.കെ. അബൂബക്കർ, യു.പി. മമ്മഡ്, സീനത്ത്, വി. ഷംലൂലത്ത്, കുന്ദമംഗലം എക്സൈസ് ഇൻസ്പെക്ടർ ടി.കെ. നിഷിൽ കുമാർ, അസിസ്റ്റൻറ് സെക്രട്ടറി അബ്ദുൽ ഗഫൂർ, ഹെൽത്ത് ഇൻസ്പെക്ടർമാരായ സി.റിനിൽ, രമേശൻ എന്നിവർ സംസാരിച്ചു.
