വിഭിന്നശേഷി വിദ്യാർത്ഥികൾക്കൊപ്പം ഓണപ്പൂക്കളമൊരുക്കാൻ ചേന്നമംഗലൂർ ഹയർ സെക്കൻഡറി സ്കൂൾ; പൂകൃഷി ഉദ്ഘാടനം ചെയ്തു
മുക്കം: വരാനിരിക്കുന്ന ഓണാഘോഷങ്ങൾക്ക് നിറമേകാൻ മുക്കം നഗരസഭ കൃഷിഭവന്റെയും ചേന്നമംഗലൂർ ഹയർ സെക്കൻഡറി സ്കൂളിന്റെയും സംയുക്ത ആഭിമുഖ്യത്തിൽ പൂകൃഷിക്ക് തുടക്കമായി. സ്കൂളിലെ വിഭിന്നശേഷി വിദ്യാർത്ഥികളും അധ്യാപകരും ചേർന്നാണ് ഈ മാതൃകാപരമായ കൃഷി ഒരുക്കുന്നത്.പൂകൃഷിയുടെ ഔദ്യോഗിക ഉദ്ഘാടനം അഡ്വ. ചാന്ദ്നി നിർവ്വഹിച്ചു. കൃഷി ഓഫീസർ ഷബീർ അഹമ്മദ് ചടങ്ങിൽ മുഖ്യാതിഥിയായിരുന്നു.വിഭിന്നശേഷിക്കാരായ കുട്ടികളെ കൃഷിയിലേക്ക് ആകർഷിക്കാനും അവർക്ക് പുതിയൊരു അനുഭവം സമ്മാനിക്കാനുമായിട്ടാണ് ഈ പദ്ധതി വിഭാവനം ചെയ്തിരിക്കുന്നത്.
ചടങ്ങിൽ നഗരസഭാ കൗൺസിലർമാരായ ജസീല അസീസ്, ബനൂജ, മനീഷ, ലീല വി, രാജൻ ബാബു എന്നിവരും ബി.ആർ.സി (BRC) പ്രതിനിധി അമ്പിളി ടീച്ചറും, സ്കൂളിലെ മറ്റ് അധ്യാപകരും വിദ്യാർത്ഥികളും പങ്കെടുത്തു. കുട്ടികളുടെയും അധ്യാപകരുടെയും സജീവ പങ്കാളിത്തത്തോടെ കൃഷി വിജയകരമായി മുന്നോട്ട് കൊണ്ടുപോകാനാണ് കൃഷിഭവന്റെയും സ്കൂൾ അധികൃതരുടെയും തീരുമാനം.
