കൊടിയത്തൂർ ഗ്രാമപ്പഞ്ചായത്തിന്റെ നേതൃത്വത്തിൽ ആരംഭിച്ച ദേവഹരിതം പദ്ധതി വിജയകരമായി മുന്നോട്ട്

കൊടിയത്തൂർ : പന്നിക്കോട് ശ്രീകൃഷ്ണപുരം ശ്രീകൃഷ്ണ ക്ഷേത്രഭൂമിയിൽ കൊടിയത്തൂർ ഗ്രാമപ്പഞ്ചായത്തിന്റെ നേതൃത്വത്തിൽ ആരംഭിച്ച ദേവഹരിതം പദ്ധതി വിജയകരമായി മുന്നോട്ട്. മൂന്നരഏക്കറിൽ ഫലവൃക്ഷങ്ങൾ, ഔഷധസസ്യങ്ങൾ, നക്ഷത്രവനം, പച്ചക്കറിത്തോട്ടം, പൂജാപുഷ്പത്തോട്ടം തുടങ്ങിയവ നട്ടുവളർത്തുന്ന പദ്ധതിയാണിത്. ഹരിത കേരള മിഷന്റെ പച്ചത്തുരുത്ത് പദ്ധതിയുമായി ചേർന്ന് 2022 ഓഗസ്റ്റിൽ ആരംഭിച്ച ദേവഹരിതം പദ്ധതി തീറ്റപ്പുല്ല് കൃഷി ആരംഭിച്ചുകൊണ്ട് രണ്ടാംഘട്ടത്തിലേക്ക് കടന്നു.

ക്ഷേത്രത്തിലെ പശുക്കൾക്കുള്ള തീറ്റപ്പുല്ലുത്‌പാദനം, തൈകൾക്കുള്ള വളപ്രയോഗം, കളപറിക്കൽ, പുതയിടൽ തുടങ്ങിയവയാണ് രണ്ടാംഘട്ടത്തിൽ ആരംഭിച്ചത്. അമ്പതോളം തൊഴിലുറപ്പ് തൊഴിലാളികളാണ് പങ്കെടുത്തത്. ഒരേക്കറിൽ തീറ്റപ്പുല്ലും രണ്ടേക്കറിൽ ഫലവൃക്ഷ-ഔഷധ സസ്യങ്ങളുമാണ് നട്ടുപിടിപ്പിക്കുന്നത്. മണ്ണൊലിപ്പ് തടയുന്നതിന് കയ്യാല സംരക്ഷണം ഉറപ്പുവരുത്തി.