കോടഞ്ചേരി: വേളംകോട് സെന്റ് ജോർജ്സ് ഹയർ സെക്കൻഡറി സ്കൂളിലെ വിദ്യാർത്ഥികൾ പന്നൂർ ഗവൺമെന്റ് ഹയർ സെക്കൻഡറി സ്കൂളിൽ സംഘടിപ്പിച്ച ദിശ 2024 കരിയർ എക്സ്പോയിൽ പങ്കെടുത്തു.
വിദ്യാർത്ഥികൾക്ക് ഉന്നത വിദ്യാഭ്യാസ സാധ്യതകളും തൊഴിൽ അവസരങ്ങളും നേരിട്ടു മനസ്സിലാക്കാൻ സഹായിക്കുന്നതിനായി കേരള പൊതുവിദ്യാഭ്യാസ വകുപ്പിന്റെ ഹയർ സെക്കൻഡറി വിഭാഗം നടപ്പിലാക്കുന്ന കരിയർ ഗൈഡൻസ് ആൻഡ് അഡോളസെൻസ് കൗൺസിലിംഗ് പദ്ധതിയുടെ ഭാഗമായി എക്സ്പോ സംഘടിപ്പിച്ചു.
പ്രമുഖ വിദ്യാഭ്യാസ സ്ഥാപനങ്ങളായ എൻഐടിയും ഐഐഎം കാലിക്കറ്റും ഉൾപ്പെടെ, ഇരുപതോളം സ്ഥാപനങ്ങളുടെയും സംഘടനകളുടെയും സാന്നിദ്ധ്യത്തിൽ വിവിധ സ്റ്റാളുകളും സെഷനുകളും നടന്നു. വിദ്യാർത്ഥികൾക്ക് ഗവേഷണവും തൊഴിൽ സാധ്യതകളും വിശദമായി പഠിക്കാൻ മികച്ച അവസരമൊരുക്കിയ പ്രദർശനത്തിൽ ഇന്ത്യൻ ആർമി റിക്രൂട്ട്മെന്റ് ടീം, കെൽട്രോൺ, കേരള ഡിജിറ്റൽ യൂണിവേഴ്സിറ്റി, പോളിടെക്നിക്കുകൾ, ഐടിഐകൾ, റോബോട്ടിക്സ് അസോസിയേഷൻ തുടങ്ങിയവ പങ്കെടുത്തു.
വിദ്യാർത്ഥികൾക്ക് പഠനമേഖലയിലെ നവീനമായ അറിവുകൾ നൽകുന്ന സൗജന്യ ആപ്റ്റിട്യൂട് ടെസ്റ്റും ഒരുക്കിയിരുന്നു. സയൻസ്, കൊമേഴ്സ് വിഭാഗങ്ങളിലെ 50 വിദ്യാർത്ഥികൾ പരിപാടിയിൽ പങ്കെടുത്തു.
പരിപാടിക്ക് മാനേജ്മെന്റ് പ്രതിനിധിയും അധ്യാപികയുമായ സി. സുധർമ്മ എസ്.ഐ.സി, കരിയർ ഗൈഡൻസ് കോഡിനേറ്റർ ലിമ കെ ജോസ്, പ്രിൻസിപ്പൽ എന്നിവരുടെ നേതൃത്വത്തിൽ അംഗീകരണം ലഭിച്ചു.
