തിരുവമ്പാടി: പിങ്ക് മാസാചരണത്തിന്റെ ഭാഗമായി സ്ത്രീകളിൽ സ്തനാർബുദത്തെക്കുറിച്ചുള്ള അവബോധം വളർത്തുന്നതിനും ജീവിതശൈലീ രോഗങ്ങൾ നേരത്തേ കണ്ടെത്തുന്നതിനുമായി ജീവിതശൈലീ രോഗനിർണയ ക്യാമ്പും ക്യാൻസർ ബോധവൽക്കരണ ക്ലാസും സംഘടിപ്പിച്ചു. തിരുവമ്പാടി കുടുംബാരോഗ്യ കേന്ദ്രത്തിന്റെയും കേരള വ്യാപാരി വ്യവസായി ഏകോപന സമിതി തിരുവമ്പാടി യൂണിറ്റ് വനിതാ വിഭാഗത്തിന്റെയും തിരുവമ്പാടി ഗ്രാമപഞ്ചായത്തിന്റെയും സംയുക്താഭിമുഖ്യത്തിൽ ഒക്ടോബർ 30 വെള്ളിയാഴ്ച രാവിലെ 10.30ന് തിരുവമ്പാടി വ്യാപാരഭവൻ ഓഡിറ്റോറിയത്തിലാണ് പരിപാടി സംഘടിപ്പിച്ചത്.
കേരള വ്യാപാരി വ്യവസായി ഏകോപന സമിതി വനിതാ വിഭാഗം സെക്രട്ടറി ശ്രീമതി അഷ്നീ ജ എം.ജെ സ്വാഗതം ആശംസിച്ചു. വനിതാ വിഭാഗം പ്രസിഡന്റ് ശ്രീമതി സിസി ലി മാർട്ടിൻ അധ്യക്ഷത വഹിച്ചു. തിരുവമ്പാടി ഗ്രാമപഞ്ചായത്ത് പതിനഞ്ചാം വാർഡ് മെമ്പറും കേരള വ്യാപാരി വ്യവസായി ഏകോപന സമിതി വനിതാ വിഭാഗം വൈസ് പ്രസിഡന്റുമായ ശ്രീമതി മറിയാമ്മ ബാബു പരിപാടി ഉദ്ഘാടനം ചെയ്തു.
തിരുവമ്പാടി കുടുംബാരോഗ്യ കേന്ദ്രത്തിലെ മെഡിക്കൽ ഓഫീസർ ഡോ. കെ.വി. പ്രിയ മുഖ്യപ്രഭാഷണം നടത്തി. ഹെൽത്ത് ഇൻസ്പക്ടർ ബിനു കൂര്യൻ, പി.എച്ച്.എൻ ത്രേസ്യ എൻ ജെ, ജെ എച്ച് ഐ മുജീബ് അബ്ദുൾ സലിം, ഗ്ലാഡിസ് സെബാസ്റ്റ്യൻ, അഞ്ജന, തുടങ്ങിയവർ സംസാരിച്ചു. സ്തനാർബുദത്തിന്റെ പ്രാരംഭ ലക്ഷണങ്ങൾ, നേരത്തെയുള്ള രോഗനിർണയത്തിന്റെ പ്രാധാന്യം, സ്വയം സ്തനപരിശോധനയുടെ ആവശ്യകത, ജീവിതശൈലീ രോഗങ്ങൾ തടയുന്നതിനുള്ള മുൻകരുതലുകൾ, കൃത്യമായ ആരോഗ്യപരിശോധന എന്നിവയെക്കുറിച്ച് ബോധവൽക്കരണ ക്ലാസിൽ വിശദീകരിച്ചു.
ആരോഗ്യരംഗത്തെ വിദഗ്ധരുടെ നേതൃത്വത്തിൽ നടന്ന പരിപാടിയിൽ സ്ത്രീകളുടെ ആരോഗ്യസംരക്ഷണത്തിനും രോഗപ്രതിരോധത്തിനും പ്രാധാന്യം നൽകുന്ന സന്ദേശങ്ങൾ പങ്കുവെച്ചു. കൂടാതെ പങ്കെടുത്തവർക്കായി ജീവിതശൈലീ രോഗനിർണയ പരിശോധനകളും സംഘടിപ്പിച്ചു. സ്ത്രീകൾ സ്വന്തം ആരോഗ്യത്തിന് മുൻഗണന നൽകണമെന്നും രോഗലക്ഷണങ്ങൾ അവഗണിക്കാതെ കൃത്യസമയത്ത് പരിശോധനകൾ നടത്തണമെന്നും പരിപാടി ഓർമിപ്പിച്ചു.
പരിപാടിയിൽ ആരോഗ്യപ്രവർത്തകർ, വ്യാപാരി വ്യവസായി ഏകോപന സമിതി ഭാരവാഹികൾ, വനിതാ വിഭാഗം അംഗങ്ങൾ, പൊതുജനങ്ങൾ എന്നിവർ പങ്കെടുത്തു. കേരള വ്യാപാരി വ്യവസായി ഏകോപന സമിതി വനിതാ വിഭാഗം ട്രഷറർ ശ്രീമതി ടീന സ്വരാജ് നന്ദി രേഖപ്പെടുത്തി. സ്ത്രീകളുടെ ആരോഗ്യസംരക്ഷണത്തിനും ക്യാൻസർ പ്രതിരോധ ബോധവൽക്കരണത്തിനും ഊന്നൽ നൽകിയ പരിപാടി ശ്രദ്ധേയമായി.
