സാലറി ചലഞ്ചിന് ആഹ്വാനം ചെയ്ത് കേന്ദ്ര സർക്കാരും; മാസത്തിൽ ഒരു ദിവസത്തെ ശമ്പളം ഒരു വർഷത്തേക്ക് സംഭാവന ചെയ്യാൻ ആഹ്വാനം
തിരുവനന്തപുരം: കേരളത്തിൽ മാത്രമല്ല, കേന്ദ്രത്തിലും സാമ്പത്തിക പ്രതിസന്ധി രൂക്ഷമായതോടെ സാലറി ചലഞ്ചിന് ആഹ്വാനം. കേന്ദ്ര ധനകാര്യ വകുപ്പാണ് സാലറി ചലഞ്ച് സംബന്ധിച്ച സർക്കുലർ പുറത്തിറക്കിയിരിക്കുന്നത്. മാസത്തിൽ ഒരു ദിവസത്തെ ശമ്പളം പിഎം കെയറിലേയ്ക്ക് സംഭാവന ചെയ്യണമെന്ന് കേന്ദ്ര ധനമന്ത്രാലയം പുറത്തിറക്കിയ സർക്കുലറിൽ പറയുന്നു.
താൽപര്യമുള്ള കേന്ദ്ര സർക്കാർ ജീവനക്കാർക്ക് സാലറി ചലഞ്ചിൽ പങ്കെടുക്കാമെന്ന് സർക്കുലറിൽ പറയുന്നു. മേയ് മാസം മുതൽ 2021 മാർച്ച് മാസം വരെയുള്ള കാലയളവിൽ മാസത്തിൽ ഒരു ദിവസത്തെ ശമ്പളം പിഎം കെയർ ഫണ്ടിലേയ്ക്ക് സംഭാവന നൽകാം. താൽപര്യമുള്ള ജീവനക്കാർ ഇത് മുൻകൂട്ടി അറിയിക്കണമെന്നും വിജ്ഞാപനത്തിൽ വ്യക്തമാക്കുന്നു.
ചില മാസങ്ങളിൽ മാത്രം ശമ്പളത്തിൽനിന്ന് പണം നൽകാൻ താൽപര്യമുള്ളൂവെങ്കിൽ അങ്ങനെയും നൽകാം. ഇതും മുൻകൂറായി അറിയിക്കണമെന്നും സർക്കുലറിൽ പറയുന്നു. റവന്യൂ വകുപ്പിനായി നൽകിയിയിരിക്കുന്ന വിജ്ഞാപനമാണ് ഇപ്പോൾ പുറത്തുവന്നിരിക്കുന്നത്.
എല്ലാ കേന്ദ്ര സർക്കാർ ജീവനക്കാർക്കും ബാധകമാകുന്ന വിജ്ഞാപനം ഉണ്ടാകുമെന്നാണ് റിപ്പോർട്ട്. സാലറി ചലഞ്ചുമായി ബന്ധപ്പെട്ട് ഏപ്രിൽ 17ന് ഒരു ആഹ്വനം നൽകിയിരുന്നു. ഇതിൽ വ്യക്തത വരുത്തിക്കൊണ്ടുള്ള വിജ്ഞാപനമാണ് ഇപ്പോൾ പുറത്തിറങ്ങിയിരിക്കുന്നത്.
