ലോക ടൂറിസം ദിനത്തിൻ്റെ ഭാഗമായി രണ്ട് ദിനം നീണ്ട ഫാം ടൂറിസം സെമിനാർ സംഘടിപ്പിക്കുന്നു.
കൂടരഞ്ഞി: കോഴിക്കോട് ജില്ലാ പഞ്ചായത്ത്, കോഴിക്കോട് അഗ്രോ ഫാം ടൂറിസം സൊസൈറ്റി (കാഫ്റ്റ്) എന്നിവയുടെ സഹകരണത്താൽ, ലോക ടൂറിസം ദിനത്തിൻ്റെ ഭാഗമായി ഫാം ടൂറിസം സെമിനാർ സംഘടിപ്പിക്കുന്നു. പദ്ധതിയുടെ ഉദ്ഘാടനം കൂടരഞ്ഞി സർവീസ് സഹകരണ ബാങ്ക് ഓഡിറ്റോറിയത്തിൽ ജില്ലാ പഞ്ചായത്ത് പ്രസിഡണ്ട് ഷീജ ശശി നടത്തി.
കേരളത്തിൽ ആദ്യമായി, ഒരു ജില്ല പഞ്ചായത്ത് ഫാം ടൂറിസത്തിനായി പ്രത്യേക പദ്ധതി രൂപീകരിക്കുന്നുവെന്ന് ഷീജ ശശി അറിയിച്ചു. ഈ പരിപാടി, ഫാം ടൂറിസം രംഗത്ത് പ്രവർത്തിക്കുന്നവർക്കും, പുതുതായി ഈ മേഖലയിലേക്ക് കടക്കാൻ ആഗ്രഹിക്കുന്നവർക്കും പരിശീലനം നൽകുന്നതിനുള്ളതാണ്. ചടങ്ങിൽ കൂടരഞ്ഞി ഗ്രാമപഞ്ചായത്ത് പ്രസിഡണ്ട് ആദർശ് ജോസഫ് അധ്യക്ഷത വഹിച്ചു, പ്രധാനാതിഥിയായി ജില്ലാ പഞ്ചായത്ത് വൈസ് പ്രസിഡണ്ട് പി. ഗവാസ്, വിവിധ നേതാക്കൾ, കൃഷി വകുപ്പിൽ നിന്നുള്ള ഉദ്യോഗസ്ഥർ എന്നിവർ പങ്കെടുത്തു. പഞ്ചായത്തിന്റെ ആദ്യദിനത്തെ പരിശീലന സെഷനിൽ, അലങ്കാര സസ്യ കൃഷിയുടെ വരുമാന സാധ്യതകൾ, ഫാം ടൂറിസം സംരഭകത്വ പദ്ധതികൾ, എന്നിവയെക്കുറിച്ച് ക്ലാസുകൾ നടന്നു. നാളെ, മുൻ ഡെപ്യൂട്ടി ഡയറക്ടർ, ഫാം ടൂറിസം സംബന്ധിച്ച പഠന ക്ലാസും, തെരഞ്ഞെടുത്ത ഫാം ടൂറിസം കൃഷിയിട സന്ദർശനവും ഉണ്ടായിരിക്കും.
